DÍA 2 - Vai de adiviñas e A cidade dos desexos

Hoxe en Lendo a Agustín Fernández Paz...
A cidade dos desexos grazas a Nuria e Mónica dende o CEIP Ponte dos Brozos de Arteixo.

Reporteiros da lingua

Dámos a benvida aos participantes da V edición dos 21DCG.

Está semana imos adicala á literatura de tradición oral popular e vos ides converter en verdadeiros reporteiros da lingua.

Sabes o que é a literatura popular de tradición oral?

Consiste nun conxunto variado de temas, formas e xéneros de arte verbal usados e transmitidos oralmente polo pobo, pola comunidade.

Pode  manifestarse como:

• forma simplemente falada (contos, lendas, adiviñas, trabalinguas, etc.
• asociada á música (cantigas)
• asociada á danza
• como parte dunha representación escénica (pouco habitual).

En Galicia esta literatura ten unha considerable importancia, tanto pola abundancia da súa produción como por conservar vivo ata hoxe un repertorio moi variado de grande interese histórico, etnolóxico e artístico.

Presenta unha serie de trazos que a caracterizan:

üExecución e transmisión oral

üVariabilidade non hai dúas execucións iguais dunha mesma peza.

üAceptación colectiva por parte do grupo sociocultural no que se emprega

üEmprégase para divertir, ensinar, establecer lazos de unión, ridiculizar defectos, aturar o traballo, galantear…
üA autoría poucas veces se coñece ou carece de relevancia

Que tal se che dan as adiviñas?

Unha adiviña ou adiviñanza é un enigma ou pregunta enxeñosa para entreterse en acertar a resposta.

RETO INDIVIDUAL DÍA 02 - Busca cinco adiviñas coa súa solución (as máis orixinais, divertidas...) O mellor de todo vai ser que preguntes por aí (familia, veciñanza, amizades....) Cando as teñas, díllelas ás persoas para ver se saben a resposta (grava tamén as respostas fallidas).

Aquí tes sete de mostra.


1.-¿Que cousa é cousa


que anda por baixo da terra,


e non ten oso nin costela?


Adiviña ti que é ela

2. - Cucurico non ten ollos, cu nin bico,


e os fillos de cucurico teñen ollos, cu e bico.


3.- A miña picadela é terribel


o meu corpo insignificante


pero o nectar que eu dou


comédelo ao instante


4.- No alto vive


no alto mora


no alto tece


a tecedora


5.-Unha cousa nin cocida nin asada


nin molar aformantada


nin comida con culler


adiviña quen puider.


6.- Son dúas irmás nun corredor,


unha dá medias e outra non.


7.- Coa punta finca,


co cu apreta,


e, co que lle colga,


tapa a greta.

Solución 1.- A miñoca  2.-O ovo e os pitiños

Pensabades que ía dar todas as solucións?

Érache boa!! Ou ben as buscades ou consultades mañá no blog.

Seguro que tes curiosidade por aprender máis!!

Podes pescudar na rede:

AS-PG
Para medrar en galego
Adiviñas do IES de Melide

Lembra que tes que gravar un vídeo.

O nome do arquivo deste reto é:

identificación_reto_02

ÁNIMO!!!!



RETO DE GRUPO 1ª SEMANA - Reporteiros da lingua na procura de adiviñas

O primeiro reto de clase destes 21 Días co Galego consiste en conseguir gravar en vídeo o maior número de persoas dicindo adiviñas diferentes.
Cada persoa deberá dicir unha adiviña, logo deixar uns cinco segundos en silencio e a continuación dicir a solución.
Ollo! Non podedes repetir persoas, cada persoa só pode aparecer cunha adiviña.
Gañarán o reto da semana as clases que consigan o maior número de persoas contando adiviñas.

Os nomes dos arquivos deste reto son:

identificación_adiviña_01

identificación_adiviña_02
etc.


ÁNIMO e A FALARRRRRR!!!!