Día 1

Hoxe, para comezar, podes responder as seguintes preguntas:

1.      Que che parece o proxecto dos 21 Días co Galego?

2.      Ti ou os teus compañeiros adoitades falar galego? Se non é así explica o porqué.

3.      Cales cres que serán os principais atrancos que podes atopar?

4.      Que é o que máis che gusta da nosa lingua?

5.      Que esperas conseguir con esta experiencia? Que vas facer para levar a cabo o teu propósito?

A continuación podes ver unha pílula informativa, na que o alumnado de bacharelato falará sobre os nomes en galego e a deturpación de apelidos. Para poder saber o que isto quere dicir terás que ver este breve vídeo.

- Agora poderías explicarnos brevemente e coas túas palabras que é o proceso de deturpación e por que se produce en Galicia?

- Ti que opinas sobre todo isto? Cres que en realidade só é unha esaxeración e non deberíamos darlle tanta importancia aos nomes e apelidos procedentes de Galicia ou cres que é conveniente preocuparse por un patrimonio histórico como son os apelidos?

-Sabes se o teu nome e apelidos son galegos?

Lembra que podes seguir todos os avances deste proxecto diariamente a través de distintas redes sociais, empregaremos Instagram, Facebook e Twitter. 

Bótalle unha ollada a todas as nosas contas e deixa os teus comentarios e opinións sobre as actividades que se propoñen e sobre os teus avances ao longo desta experiencia.

Moito ánimo na túa aventura co galego!!